Вядучы 2004 году - Сяргей Навумчык

Наведнікі сайту "Неафіцыйная Свабода / Мая Свабода" выбралі вядучага 2004 году на Радыё Свабода. Паводле вынікаў апытаньня найбольшая колькасьць галасоў (38%) - у Сяргея Навумчыка. На другім месцы - Вольга Караткевіч (23%), на трэцім - Сяргей Шупа (17%).

Вельмі цікавая барацьба разгарнулася паміж прыхільнікамі Сяргея Навумчыка й Вольгі Караткевіч. Працэс галасаваньня нагадваў спартыўнае спаборніцтва. На пачатку сьнежня першае месца ўпэўнена займала Вольга Караткевіч, якую летась наведнікі сайту выбралі вядучай 2003 году, але потым сытуацыя паступова мянялася й наперадзе апынуўся Сяргей Навумчык.

Больш дэталёва азнаёміцца з вынікамі апытаньня "Вядучы(ая)-2004" можна тут.

Біяграфія Сяргея Навумчыка

Паводле www.svaboda.org і www.draniki.com

Нарадзіўся 15.12.1961 у Паставах. Скончыў факультэт журналістыкі Белдзяржунівэрсытэту, служыў у войску. Удзельнічаў у самвыдатаўскім друку. У 1990-1996 гадох - дэпутат Вярхоўнага Савету Беларусі, каардынатар парлямэнцкай Апазыцыі БНФ, сябра Канстытуцыйнай Камісіі і парлямэнцкай Камісіі ў пытаньнях СМІ і правоў чалавека. Узначальваў інфармацыйнае агенцтва "Павет".

У 1996 годзе вымушаны пакінуць Беларусь. Камандуючы памежнымі войскамі РБ выдаў распараджэньне памежнікам затрымаць яго у выпадку ўезду на тэрыторыю Беларусі (газэта "Свабода", 12 траўня 1996 г.). У жніўні 1996 году атрымаў палітычны прытулак у ЗША.

Публікаваўся ў выданьнях ЗША, Нямеччыны, Расеі, Польшчы, Украіны, Францыі, Чэхіі.

На "Свабодзе" ад 1990 году.

25.01.2005