Пракуратура папярэдзіла карэспандэнта Радыё Свабода

Пракуратура Беларусі вынесла папярэджаньне журналісту Радыё Свабода Альгерду Невяроўскаму, паведамляе БАЖ. Падставай для папярэджаньня стаў артыкул на сайце "Свабоды", у якім пададзеныя сэнсацыйныя фотаздымкі з выбарчага ўчастку падчас папярэдняга галасаваньня на выбарах дэпутатаў і рэфэрэндуму, зробленыя 16 лістапада. У артыкуле гаворка ішла пра тое, што выбарнікам выдавалі бюлетэні з ужо пазначаным адказам на пытаньне рэфэрэндуму "за"

У пракуратуры журналісту паведамілі, што распаўсюджаныя ім зьвесткі не адпавядаюць рэчаіснасьці: нібыта гэта былі бюлетэні з адзнакаю пра адмену рэгістрацыі кандыдатам у дэпутаты В.Палевіковай.

А.Невяроўскага пазнаёмілі з артыкулам 40 "Закона аб друку і іншых сродках масавай інфармацыі" і папярэдзілі пра неабходнасьць праверкі распаўсюджаных зьвестак. Журналісту патлумачана, што пры паўтарэньні падобнага выпадку можа быць пастаўленае пытаньне пра пазбаўленьне яго акрэдытацыі.

Упершыню рэпартаж за аўтарствам Альгерда Невяроўскага быў агучаны ў эфіры 16 кастрычніка, а на наступны дзень фотаздымкі з запоўненымі бюлетэнямі былі разьмешчаныя на сайце Радыё Свабода.

Рэакцыю з боку ўладаў доўга чакаць не прыйшлося. Старшыня Цэнтрвыбаркаму Лідзія Ярмошына падчас ранішняй прэс-канфэрэнцыі 17 кастрычніка назвала згаданыя здымкі "каляжам". Увечары яна зноў узгадала матэрыял "Свабоды". На сустрэчы з журналістамі а 19:00 Л.Ярмошына яшчэ раз сказала, што інфармацыя радыё не адпавядае рэчаіснасьці, прыгразіўшы распачаць крымінальную справу з нагоды артыкулу, разьмешчаным на сайце.

8.12.2004